Sco mintga gi essan nus s’entupai allas 08.00 uras tier il solver. Ferton ch’ils giugadurs eran ils davos gis adina punctuals, han certins duvrau oz empau pli ditg da vegnir ord il letg. Forsa ch’ei schischeva vid ils stregns trenaments dils davos gis, forsa denton era vid la liunga notg ella bar cun giugs da nies student ;). Suenter haver empleniu il magun essan nus serendi al davos trenament da quei camp. Ils biars giugadurs sentevan las grevas combas suenter il stentus giug amicabel dil gi vargau. Tuttina han els absolviu il trenament plein motivaziun. Mo in giugadur ha stuiu ceder muort ina blessura ed ha accumpignau il trenament cun fotografar e filmar. Il trenader ha giu cumpassiun cun nus e fatg in trenament empau pli luc. Igl impurtont era da tener a cauld la musculatura e migliurar il sentiment pil bal sin pastg. Aschia era il trenament puspei spert vargaus ed ils biars eran leds da saver serevegnir entginas minutas avon che ir a gentar.
Cunquei che la gronda part dils giugadurs senteva il strapaz dils davos gis e veva pauca motivaziun da pitir ina ulteriura ga sil plaz da bal, vein nus decidiu da midar program e far zatgei per la cultura. Aschia essan nus serendi cun bus el center d’Antalya. Nies accumpignader da viadi ha mussau a nus il bein frequentau marcau. Sper stizuns, bazars e la mar vein nus gudiu in pign sitg en ina ustria. Leu ha era il tradiziunal vinars „Raki“ buc astgau muncar. Entgins han buiu quel cun gust ed ils auters han giu da cumbatter per dumignar giuaden quella broda ;). Silsuenter essan nus turnai anavos el hotel e ruassau in mument. Entgins giugadurs ed il trenader han schizun aunc gudiu ina flotta massascha. Beingleiti era ei puspei temps da magliar e guder la sera cun giugs e gervosas. Con ditg che quella sera ha cuzzau vegnin nus ad anflar ora damaun...
Ils seniors Rino ed Aurelio
Kommentar schreiben