Ei va liber - nus mein el camp. Naven dad immediat saveis leger nos blogs e persequitar nos trenaments e nossas activitads sin nossa pagina ed era sin instagram. 

Vendedis, sonda e dumengia, ils 31.01.2025 - 02.02.2025, eisi puspei stau schi lunsch. Varga 80 bials e gronds premis han carmalau, mo era il star da buna cumpignia ei probablamein stau in dils motivs che nies turnier da jass 2025 ei staus in cumplein success.

103 differents giugadurs han dau jass duront quels treis dis - in niev record per nus. La pli aulta passa cun 869 puncts han Madalena Caduff e Janic Alig contonschiu. Cordiala gratulaziun!

Gudignau il turnier ha la giugadura talentada Sina Demont da Castrisch cun total 2'449 puncts.

Il secund rang cun 2'432 puncts ha la passiunada Madalena Caduff da Morissen contonschiu.

Sil tierz rang cun 2'418 puncts ei Beat Camiu dar Rueun/Glion staus che ha dau in pèr bialas passas cun bia puncts.

Cordiala gratulaziun ad els treis, mo era a tut ils jassists e tuttas jassistas ch'ein stai presents duront quels treis dis ed han aschia susteniu noss'uniun.

Ei ha fatg plascher da beneventar tons al turnier da jass 2025, seigi sco giugadurAs ni era aspectaturAs. Nus selegrein gia uss sin l'auter onn puspei, medem temps, medem liug!

Vossa US Rueun