Il gi da giug

Suenter ina sera che tuts ein i ad uras a letg ;) essan nus levai cun fetg gronda motivaziun damai che savevan che vein in giug amicabel il suentermiezgi encunter ina equipa tudestga. Certs han denton tuttina fatg vess da levar. Nums numneinsa negins. Il solver ei staus detg stupents sco adina. Silsuenter essan nus beingleiti sepreparai pil trenament dallas 9.30 che ha giu liug sco adina sin in plaz sper il hotel. Nies capitani ei currius en cun nus e lu vein nus giu treis differents exercezis cun la balla. Suenter vein nus aunc sittau a cauld Joris empau cun buns e deplorablamein e schliats siets sin gol. La fin vein nus aunc dau in giug cun quater gols. Quei giug ei vegnius daus cun in grond cumbat, denton ha negin sefatg mal pli fetg. Suenter il trenament vein nus giu ina cuorta pausa tochen che nus essan i a magliar da miezgi. Il buffet purscheva puspei bia spisas bunas ed e meins bunas. Cunzun ils spaghettis paran dad esser ualti buns per certs giugadurs. Lu han quasi tuts fatg in cupid ed ein sepreparai mentalmein sil giug.

Per dar il giug vein nus stuiu ir in toc cun bus. Gest arrivai essan nus semess sin via en cabina. Leu vein nus viu che nies student ha soccas che han pli bia ruosnas che in Emmentaler. Suenter quei schoc essan nus i sil plaz, fatg fotis e curri en. Lu ein era nos adversaris arrivai ed il giug ha saviu ir liber. Els vevan in toc dapli giugadurs sin baun che nus. Ils arbiters ein dalla Moldavia. Nies adversari ei il FSV Sandharlanden. Nus vein dau dètg stupent e teniu cun dètg pulit en quei giug. Suenter pausa vein nus schau suenter empau e deplorablamein spiars il giug fetg knapp cun 4:2. Ils goals per nus han Lucas e Tobias fatg. Fabian e Dario han giu il debut per la USR en quei giug. La fin essan aunc curri o e semess lu puspei sin via cul bus anavos tiel hotel. Leu vein nus saviu far nossa duscha meritada ed entgins han gudiu ina gervosa freida sin quei giug. Las 19.00 essan nus sentupai per ir communablamein a tscheina sco quei s'auda en in'uniun. Suenter tscheina vein nus giu temps liber e schau ruassar nossas combas e musclas cun ina, duas gervosas tier la bar.

In saletti dad Antalya da Martin, Dario e Fabian